مدير متواضع

مرحبا.. اسمي علي, واشتغل اوبر بامريكا

قبل شوية صعد وياية مدير القسم التكنولوجي بشركة جنرال موتورز. الشركة المسؤولة عن تصنيع اغلب السيارات الامريكية. فد انسان بسيط ومتواضع الى درجة لا توصف.

اول ما صعد شكرني لان دا اسوق سيارة شوفرليت من صناعتهم, وشكرني لان دا اسوق سيارة كهربائية صديقة للبيئة.

حجينا شوية على سيارتي والتكنولوجي الي بيها والتغييرات الي راح تصير بهذا المجال بالسنين الجاية.

سألته شلون دخل لهذا المجال, لان هو كلي كمل دراسات علاقات دولية وهالشي بعيد عن الي ديسويه حاليا. طلع هو اول شي دارس محاماة, بعدين درس علاقات دولية وبعدها درس بالبيت الابيض, ومن خلال هالشغل تعرف على مدير شركة جنرال موتورز من جاي يشتغل على قضية بالتجارة ويه الصين, بعدها صاروا اصدقاء وعرض عليه العمل.

الحلو قبل كل هذا الحجي بشبابه جان يسابق سيارات الفورميلا 2000 ومن ذاك الزمن طور حبي للسيارات. ما وصل بالدراسة لهذا المجال, بس بالشغل وصل للمكان الي يحبه.

هو بيته بغير ولاية وبنفس اليوم راح يرجع للبيت, جان هو وزوجته وابنه بهذه الولاية. دز مرته وابنه بالطيارة وهو راح يرجع سياقة, لان وياهم كلبهم واذا يرجعون كلهم بالطيارة الكلب راح يحطوه بقفص بذيل الطيارة وهو ما يحب كلبه يتعامل هيج, لذلك راح يسوق عشر ساعات علمود كلبهم.

وهاي_الدنيا